रेफ्री हालिल उमुट मेलेरलाई मैदानमा मुक्का हान्ने एमकेई अंकारागुकुका अध्यक्ष फारुक कोकालाई स्थायीरुपमा प्रतिबन्ध गरिएको टर्किस फुटबल संघले जानकारी दिएको छ ।

टर्कीको शीर्ष लिगको खेलमा कायकुर रिजेस्पोरसँगको खेलमा टोली बराबरी रोकिएपछि अंकारागुकुका अध्यक्ष कोका मैदानमा प्रवेश गरेर मेलेरमाथि आक्रमण गरेका थिए । घटनाका सम्बन्धमा उनलाई पक्राउ गरिएको थियो । अंकारागुकुलाई २० लाख लिरा जरिवाना तोकिएको छ भने ५ वटा घरेलु मैदानमा हुने खेल समर्थकबिना खेल्नुपर्नेछ ।

सोमबारको यो घटनापछि लिगका खेलहरू स्थगित गरिएका थिए । संघले आगामी मंगलबारदेखि लिगका खेलहरू सुचारु गर्ने निर्णय पनि गरेको छ ।

उक्त घटनामा मेलेरमाथि अन्यले पनि आक्रमण गरेका थिए । उनको शरीरमा विभिन्न भागमा चोट लाग्नुका साथै सामान्य फ्रयाक्चरसमेत भएको थियो । उनको अस्पतालमा उपचार गरिएको थियो ।

३७ वर्षीय मेलेर टर्कीका शीर्ष रेफ्रीमध्ये एक हुन् । उनले फिफाका अन्तर्राष्ट्रिय खेलहरू पनि खेलाउँछन् भने यूईएफएका शीर्ष रेफ्रीहरुमध्ये पनि पर्दछन् ।