भारतीय जनता पार्टीले सोमबार एउटा चकित पार्ने निर्णय गर्दै मोहन यादवलाई मध्य प्रदेशको नयाँ मुख्यमन्त्रीमा चयन गरेको छ । मध्यप्रदेशको राजधानी भोपालमा सोमबार बसेको विधायक दलको बैठकले उनको नाम अनुमोदन गरेको हो ।

बैठकमा हरियाणाका मुख्यमन्त्री मनोहर लाल खट्टरको नेतृत्वमा तीन केन्द्रीय पर्यवेक्षकहरू पनि उपस्थित थिए । यो बैठकअघि राष्ट्रियस्तरमा भावी मुख्यमन्त्रीका रुपमा मोहन यादवको नाम सायदै कसैले सुनेका थिएनन् तर स्थानीय तहमा उनको नामको चर्चा भएको बताइएको छ ।

मोहन यादव तेस्रो पटक विधायक बनेका छन् । उनी शिवराज सिंह चौहानको सरकारमा उच्च शिक्षामन्त्री थिए। मोहन यादवको नाम घोषणासँगै चौहानको बिदाइ हुने भएको छ । भारतीय जनता पार्टीले भर्खरै भएको विधानसभा चुनावमा राज्यको २३० विधानसभा सीटहरू मध्ये १६३ सिट जितेको छ। चुनावअघि भाजपाले मुख्यमन्त्रीका लागि कुनै नेताको नाम अघि सारेको थिएन।